ֺيوميات شقاوة بنات بس اخر حلاوة

[ندعوك للتسجيل في المنتدى أو التعريف بنفسك لمعاينة هذه الصورة]

اليوميات عاطفيه رومانسيه مضحكه .
يلا مش هطول عليكو اكتر من كده وهقولكو القصه :

ريتاج بتتصل بملك على الفون.
ريتاج : الوووو .
ملك : الووو .. ايوة.
ريتاج : ايوة .. ازيك يا ملوكه.
ملك : الحمد لله .. ازيك انتى يا عسل.
ريتاج : الحمد لله تمام .. إيه؟!
ملك : ايه ايه انتى موش جايه المدرسه بكره ولا ايه ؟
ريتاج : والله مكسله اوى موش عارفه كده مالى.
ملك : لاء يا توتى بليز تعالى بلييييييز .. ده بكره اول يوم هتسبينى لوحدى .
ريتاج بأستهبال :لاء اتحايلى عليا شويه .
ملك بعصبيه :بقولك ايه هتيجى يعنى هتيجى فاهمة .
ريتاج: طيب طيب خلاص يالهوى عليكى .
ملك : هيييييييه هتيجى هتيجى.
ريتاج :طيب روحى جهزى اللبس علشان بكرة ..سلام.
ملك : سلام يا عسل.

تعريف للشخصيات الرئيسيه :

ريتاج بنت جميله وذكيه تبلغ من العمر 15 سنه فى الصف الاول الثانوى العلمى هواياتها كرة السله والقراءه هاديه جدا

ملك بنت جميله وذكيه تبلغ من العمر 15 سنه مع ريتاج فى نفس الفصل
هواياتها القراءة وهى رسامه وعصبيه جدا جدا ومندفعه ومتسرعه
وبتكره المقالب خالص ورومانسيه جدا ومتقلبه المزاج

شاهى بنت قلبوظه وشقيه اوى وبتحب تعمل المقالب موت زى عنيها وبالذات فى ملك هيا مع ملك وريتاج فى نفس الفصل

نكمل القصه :
فى احدى مدارس مصر الجديده قبل طابور الصباح تقابل الاصدقاء من جديد
ملك : شاهى ..ريتاج وحشنى مووت ازيكو يا عيال
شاهى : عيال احنا عيال ماشى ماشى هنردهالك يا ست ملك
ريتاج : اسكتى بقى .. ازيك انتى يا ملوكه انتى كمان وحشتينى (اكنهم مش لسه متكلمين امبارح)
ملك: والنبى يا شاهى مش عايزين مقلب من مقالبك السخيفه دى
ريتاج : اه بلاش مقالبك دى يا سخيفه
شاهى : ايه ده انتو الاتنين عليا ماشى ماشى والله لهتشوفو ..
ويسمعو صوت الجرس
شاهى : ايه ده الجرس رن .. احنا لحقنا
ملك: على رأيك

ولما طلعو الفصل بدأت مقالب شاهى فى مدرسه المنطق
ريتاج : ملك مزهقتيش الست دى عماله تلوكلوك من الصبح وانا مش فاهمة حاجه
ملك: شويه كمان وهطق
تنط شاهى من وراهم وتقول : بتخططو لايه من ورايا
ريتاج : ابدا زهقانين
شاهى :طيب استنو عليا وانا هضحكو دلوقتى
ملك : هتعملى ايه
شاهى : هتشوفى ... يا استاذه يا استاذه
المدرسه : نعم يا شاهى فى ايه
شاهى : انا مش فاهمة حاجه يا استاذه
المدرسه : مش فاهمة ايه يا شاهى
شاهى : مش فاهمة المعادله دى
المدرسه بأستغراب : معادله ايه
شاهى : دى يا استاذه اللى على السبورة .. وبعدين حضرتك وافقه ليه اتفضلى اقعدى اقعدى يا استاذه
المدرسه بحسن نيه : شكرا يا شاهى
ويادوب جايه تقعد يعينى راحت شاهى شدت الحبل اللى كانت رابطاه فى رجل الكرسى وهوووب وقعت المدرسه على الارض
والفصل كلو فى صوت واحد : ههههههههههههههههههاى
وقامت المدرسه وهيا متضايقه اوى : مين اللى عمل كده ايه الكرسى ده اكيد مكسور

ومر اليوم الدراسى وريتاج وملك وشاهى مروحين مع بعض
ريتاج : يوم ممل اوى
ملك : اه بس الا المقلب اللى عملتو البت شاهى ده هههههههه
شاهى : يلا اى خدعه عدو الجمايل ه
وقطع صوتها موبايل ملك
ريتاج : مين بيتصل
ملك بفرحه : ده كريم

كريم ولد فى كليه شرطه بيحب ملك وملك بتحبو ذكى جدا وعصبى شويه دمو خفيف

نرجع تانى للقصه
شاهى : يوووو انا مش بحب كريم ده خالص
ملك : اسكتى بقى علشان هرد عليه
شاهى : يووووووو
ملك : الو
كريم : ايوة يا حبيبتى
ملك : ازيك يا كريم
كريم : الحمد لله تمام ازيك انتى
ملك : كفايه عليا انى اسمع صوتك يا حبيبى
كريم :وحشتينى
ملك : ......
كريم : مالك اتكسفتى
ملك : شويه
كريم : حبيبتى بتتكسف يا خواتى
ملك : هههههههههههه
كريم : طيب يا حبيبتى انتى فين
ملك : انا مروحه البيت
كريم : ترجعى بالسلامه رنى عليا لما توصلى
ملك : اوك
كريم : طيب يا حبيبتى انا بس حبيت اطمن عليكى
ملك : اوك
كريم : يلا ترجعى بالسلامة ..باى
ملك : باى
شاهى : خلصتى
ريتاج : فى ايه براحه على البت
ملك : دا انتى رخمة بجد
شاهى : انتى ارخم ... طيب انا وصلت سلام اشوفكو بكره
ريتاج : سلام
ملك : باى
ريتاج : مالك يا بت سرحتى فى ايه
ملك : ه لا ابدا مفيش
ريتاج : لا حول ولا قوة إلا بالله العلى العظيم
ملك : سبينى بقى يا توتى
ريتاج : وكمان بتدلعينى ياسعدو يا هناه
ملك بأستعباط : هو مين ده
ريتاج : لا والنبى شوفو البت
ملك : توتى يلا باى اشوفك بعدين
ريتاج : اوك خدى بالك من نفسك
ملك : اوك وانتى كمان
وفضلت ملك ماشيه سراحانه وبعدين رنت على كريم وطلعت البيت

بعد ما كل واحده رجعت بيتها
نروح لبيت ريتاج ونشوف ايه هناك
دخلت ريتاج الفيلا بضجه وهى بتقول
ريتاج : ياناس يا عالم انا جيييييييييت
اخوها مازن بأستهبال : نورتى البيت

مازن اخو ريتاج عمره 18 سنه وسيم جدا وطيب وحنون وبيحب اختو
وبيحب يضايقها وبيخاف عليها ودايما ابدا يحب يدايقها

ريتاج : طبعا نورت البيت يا خويا موش انا اخر العنقود
مازن وهو بيطلع لسانو : اخر العنقود مين يا بيبى انتى فاكره انك هتاخدى حب بابا منى لاء انسى
ريتاج بدلع : بابا .. شوف ابنك ده
الاب : بس يا مازن سيب اختك فى حالها

الاب (محمد) حنين اوى وبيحب اولادو وبيحاول يعوضهم عن نقص الحنان بعد فقدان الام وهى توفت فى حادث ومتزوجش بعدها عنده شركه استيراد وتصدير

مازن : تحت امرك يابابا
ثم يكمل هامسا لريتاج ليا كلام معاكى بعدين يابيبى
ريتاج : هتعمل ايه يعنى
مازن : هعمل ايه اصبرى عليا بقى
وقام يجرى وراها وهيا قامت تجرى
مازن وهو بيجرى : هعمل ايه ها خدى هنا يا بت
ريتاج : ههههههاى ياسلام يا بطئ
وقفلت عليها باب غرفتها
مازن : يا خوافه ماشى
ريتاج : اسكت بقى
وراحت غيرت لبسها وصلت ونامت

ثانى يوم فى المدرسه كانت ريتاج قاعده مع ملك قبل الطابور
ريتاج : شاهى اتأخرت كده ليه
ملك : يا سلام على اساس انها بتيجى بدرى اصلا
ريتاج : على رأيك
ورن جرس الطابور وهما فى نص الطابور جت شاهى وهيا مش قادرة تاخد نفسها
ملك : شوشو فى ايه يا بت ؟
شاهى : ياااه على اللى حصلى انا كونت ماشيه ...
وقبل متكمل جملتها طلعت مدرسه _يعنى يا شاهى كلامك بيتقطع كتير مرة كريم ومرة مدرسه مهزله يعنى _
المدرسه : شاهى جايه متأخرة وبترغى مع اللى جنبك
شاهى : سورى يا استاذه .. انا مليش دعوة هما اللى اتكلمو معايا
المدرسه : طيب اسكتو واسمعو النشيد الوطنى
تحيا جمهوريه مصر العربيه
شاهى : واحد فول واتنين طعميه
ملك وريتاج : هههههههههه يخرب عقلك

وعدت حصه ورا حصه ورا حصه لغااايه مجيه البريك ونزلو
ملك : حد عايز حاجه من الكافتريا
شاهى : اه انا عايزة عصير وشيبسى وكيك و...
ريتاج : بس بس كل ده
شاهى بطريقه تخوف : اه حد عندو مانع
ريتاج بخوف _البت خافت يعينى _: هو انا قلت حاجه
ملك : ههههههههههه
شاهى بنفس الطريقه : وانتى كمان بتضحكى على ايه ياختى
ملك : هاا لاء مفيش انا اسفه والله_ وانتى كمان خوفتى لاحول الله يارب شاهى عامله رعب فى المنطقه والمناطق الجاورة _
شاهى : اه بحسب ناس تخاف متختشيش

وعدت كام حصه كده وبعدين جه مدرس الرياضيات
وشاهى تكره جاحه اسمها رياضيات
ولازم تزهق المدرس فى عيشتو
دخل المدرس
المدرس : صباح الخير ازيكو يا تلاميذ
شاهى : صباح ايه يا استاذ احنا بقينا الضهر
المدرس : طيب يا لمضه ...اتفضلو اقعدو
شاهى : شكرا يا استاذ
المدرس : نبدأ بس الله توكلنا على الله
شاهى : انت جاى تخطب
المدرس : شاهى كلمه كمان وهتنزلى تحت للمديرة
شاهى : سورى يا استاذ
وبرضو مش رحمت المدرس كل ميقول كلمه تتريق عليه لغــايه
المدرس : شاهى اخرجى برا واستنينى عند مكتب المديرة فاهمة
شاهى : لا يا استاذ اسفه خلاص ونبى اخر مرة
المدرس : بقول اخرجى مسمعتيش
وانتو فاكرين انها هتسيبو لاء مسبيتهوش برضو
فضلت وملت كيس ميه وبعدين والاستاذ نازل على السلم
هووووووووب ولبسو بقى محتاج يتحط فى الشمس

وخلص اليوم على خير ومحصلش حاجه تانى
وهما ماشين مروحين بيتهم
رن موبايل ملك طبعا شاهى هتفرقع
ملك : كريم بيتصل
شاهى : يوووووووو
ريتاج : شاهى بطلى رخامه
شاهى : والله شكلو هيوديكى فى داهية فى الاخر
ملك : داهية تاخدك

عايزين تعرفو ايه اللى حصل بعد كده
تابعونا وانتظرو جديدنا
لاكن انا عايزة اسألكم سؤال
1_هل ملك حبها لكريم ده صح والى اين سيؤدى بها نهاية الطريق

[ندعوك للتسجيل في المنتدى أو التعريف بنفسك لمعاينة هذه الصورة]

مستني الردوووود

» قنبلة الموسم من dj الشبح ريمكس مهرجان شقاوة جانا الدعوة عامة 1-7